LA FLICA E L’ ORSO

Dopo zena (polenta e late),
co iero picio (ani trenta),
mio nono de peso
el me portava a leto
e fiabando de l’Orco cativo (omo nero)
soto el cussin me ingrumavo de paura;
e subito me indormenzavo
sicuro e in scuro.
Ogni domenica matina
un omo dal Carso rivava a pìe
con Argo (can lupo)
e a cadena un orso bruno
(Bruno anca de nome)
e tanti fioi drio de lu come capreti.
Vocianti, curiosi, festanti;
ma… scostai un tantin,
alegri gioiosi da Scoglieto
fin zò in Foro Ulpian.
E qua, a cercio sentai per tera,
vardar l’orso balar;
se prima l’omo
gaveva razimolà le fliche;

che se no, nol saveva far;
e Bruno
solo a ritmo de tamburel scampanelà
se ricordava.
Un mondo de divertimento… e tuti.
omini e done se fermava
a vardar la bestia orso
moverse con tanta grazia,
educà e temperà a la carola.
Un rider, ma un rider tanto e tanto fioi,
che mai più dopo cussì e per cussì poco.
Ogigiorno inveze no xe fliche che tegni,

che i fioi xe ‘ssai più svei.
Ga tuto cambià, girà.
No xe più i orsi che bala de omini
ma omini e done che bala de orsi;
cussì bel che no ve digo.
Saria anca de rider ma no voio
esser bacheton o passar per frignon,
ma se podessi,
pur con magia, indrio tornaria.
Cossa ve par;
sbaglio o go ragion?